A Fundación Hipocrática do Colexio Oficial de Médicos da Provincia da Coruña puxo en marcha o V Concurso de Casos Clínicos para Residentes, convocatoria na que poden participar os médicos colexiados de calquera especialidade que sexan residentes a 1 de xaneiro de 2027. Os interesados en facelo deben remitir os seus traballos antes do 28 de febreiro de 2027 ao correo electrónico info@comc.es, co asunto “V Concurso Casos Clínicos para residentes”.
O xurado seleccionará os dez casos mellor puntuados, que os seus autores exporán de forma presencial ou por videoconferencia mediante GoTo Meeting. Os tres mellores recibirán premios de 1.000, 750 e 500 euros, e os 50 casos con maior puntuación publicaranse nun libro electrónico editado polo Colexio. Esta obra terá carácter oficial, con ISBN e depósito legal, polo que será válida para efectos curriculares e puntuable en procesos de oferta pública de emprego.
Cada caso poderá ter un máximo de tres autores e debe ser inédito: non pode ter sido presentado en ningún congreso ou reunión científica nin publicado en ningunha revista. O primeiro autor asinará un documento que o garanta e declarará que conta co consentimento informado do paciente por escrito.
Os traballos, de 400 palabras como máximo —sen contar bibliografía, táboas, figuras nin iconografías—, constarán de introdución, caso clínico, por que se considera interesante, cal é a súa aplicabilidade e bibliografía de interese. Para conservar o anonimato presentaranse en dúas follas: na primeira debe figurar o título e os datos de filiación do primeiro autor —DNI, servizo, hospital ou centro de saúde e área sanitaria—, e a segunda —a única que recibirá o xurado— conterá o título e o contido do caso.