• As novas instalacións están dotadas coa última tecnoloxía audiovisual e contan con espazos deseñados para cubrir as necesidades da institución e os colexiados
• Tamén se empregará para organizar eventos e actividades multidisciplinares en colaboración con outras institucións colexiais e sociedades científicas
• Luciano Vidán: “A presenza do Colexio en Ferrol está garantida”
• Nos próximos días presentarase o programa de actividades que acollerá a sede, que arrincará o 14 de maio cunha xornada formativa
Ferrol, 8 de maio de 2026 – O Colexio Oficial de Médicos da Provincia da Coruña inaugurou esta mañá a súa nova sede en Ferrol, situada no número 61-63 da avenida de Esteiro —nunha inmoble propiedade da Agrupación Mutual Aseguradora (A.M.A.)—. O acto estivo presidido polo presidente da institución colexial, Luciano Vidán, acompañado polo alcalde de Ferrol, José Manuel Rey Varela; o conselleiro de Sanidade, Antonio Gómez Caamaño; o almirante do Arsenal de Ferrol, Vicente Rubio Bolívar; o reitor da Universidade da Coruña, Ricardo Cao Abad; a delegada da Xunta en Ferrol, Martina Aneiros Barros e o presidente da Agrupación Mutual Aseguradora, Luis Campos Villarino. Ao acto tamén asistiron responsables da área sanitaria ferrolá e representantes dos colexios profesionais sanitarios da provincia e a comunidade autónoma.
O doutor Vidán destacou a vinculación histórica entre a institución colexial e Ferrol desde a súa fundación, en 1894, e sinalou que, con este cambio, “agora o Colexio conta en Ferrol cunha sede moderna e accesible, dotada coa última tecnoloxía audiovisual e unha aula magnífica” para cubrir as necesidades da institución e dos colexiados. As instalacións dimensionáronse para adaptalas á realidade actual, “na que cada vez é menos necesario acudir presencialmente ao Colexio para realizar trámites administrativos. Desde hai anos temos practicamente todos os nosos procedementos dixitalizados, polo que os interesados poden levalos a cabo por vía telemática se o desexan. As únicas xestións para as que segue sendo necesario acudir en persoa son aquelas en as que, por motivos de seguridade, necesitamos acreditar fidedignamente a identidade do interesado”.
Neste sentido, o presidente colexial destacou a excelencia do sistema de xestión da entidade, que leva acreditado desde 2015 coa certificación de calidade ISO 9001:2015. “Fomos pioneiros en conseguila, situándonos á vangarda do asociacionismo profesional en España, e seguimos renovándoa porque queremos que todas as persoas e colectivos que fagan uso dos nosos servizos queden plenamente satisfeitos”.
Alén de atender as necesidades dos case 900 colexiados de Ferrolterra, a intención da Xunta Directiva do Colexio é que as instalacións se utilicen tamén para organizar eventos e actividades multidisciplinares en colaboración con outras institucións colexiais e sociedades científicas, e que diferentes colexios do ámbito da saúde con presenza na cidade departamental poidan empregalas para as súas necesidades.
Ao longo da súa historia, a institución colexial desenvolveu en Ferrol un “labor intenso de protección dos dereitos dos médicos e dos pacientes, actualización dos coñecementos dos profesionais e organización de campañas de concienciación e prevención para mellorar a saúde da poboación”, asegurou o doutor Vidán. “Sempre cun forte compromiso coa sanidade, tan marcada en Ferrol pola súa condición de cidade naval e de punto de referencia da sanidade da Armada a nivel nacional e da sanidade galega en xeral”. Todo este traballo e o legado histórico do Colexio foi recoñecido o ano pasado coa Insignia de Oro de Ferrol, e “con este novo espazo continuaremos o noso labor con renovadas enerxías”. Nos próximos días presentarase o programa de actividades que acollerá a sede, que arrincará o 14 de maio cunha xornada formativa sobre patoloxías cardiovasculares e respiratorias para residentes da área ferrolá.
As novas instalacións, que “nacen coa vocación de ser un espazo vivo e un punto de encontro coa sociedade”, son unha mostra do compromiso do Colexio con Ferrol, “cidade na que a nosa presenza está garantida, como aprobou a Asemblea Xeral do Colexio fai xa un lustro a proposta da nosa Xunta Directiva”, afirmou o doutor Vidán. Ata o de agora, a institución contaba cunha histórica sede na praza de Callao que, con todo, non se axustaba ás necesidades actuais da institución. Por esa razón, “o Colexio e o Concello de Ferrol asinamos un acordo para a cesión do seu uso —mediante o que o Colexio segue mantendo a propiedade do inmoble— e que, desta forma, o goberno local destine as instalacións aos fins que mellor sirvan aos ferroláns. É unha satisfacción que ese espazo sirva agora para dar un servizo público a todos os veciños”.